നെയ്തൽ നിലങ്ങൾ

മലയാളക്കര ഇന്നും സൗഭാഗ്യങ്ങൾ എണ്ണിപ്പറയുന്ന ഒരു തലമുറയുടെ ഉള്ളറകളിൽ ജീർണ്ണിച്ച് തീർന്ന കുറെയേറെ ജന്മങ്ങളുണ്ട്. ആധുനികതയുടെ മുന്നേറ്റങ്ങളുടെ ഉമ്മറം തൊടാതെ വെണ്ണീറായ കുറേ സ്വപ്നങ്ങളുള്ള മനുഷ്യർ. കുടുംബമായിരുന്നു അന്ന് ബലഹീനത; സൗഹൃദമായിരുന്നു കരുത്ത്. ഇവയ്ക്കപ്പുറത്തേക്ക് ചിന്തിക്കാതെ ജീവിതം തുഴയാൻ ഇറങ്ങുമ്പോൾ പലർക്കും പ്രായം ഇരുപതുകളിലേക്ക് കടന്നിട്ടുപോലുമുണ്ടായിരുന്നില്ല.

ഭാര്യ വെളിച്ചമാകുന്ന, ഭാര്യയിലൂടെ സമാധാനം കാണുന്ന ഒരു കാലഘട്ടം. ബഹുഭാര്യത്വം ജീവിതങ്ങൾക്ക് വിലങ്ങുവെക്കുമ്പോഴും അതിന്റെ നിഴലിൽ ആദ്യഭാര്യ ഉണർന്നുനിൽക്കുമ്പോഴും, അവൾ ഭർത്താവിന്റെ ചിന്തയും സമ്പത്തുമായി മാറുമ്പോഴും ജീവിതത്തിന്റെ അർഥം മറ്റൊരു തലത്തിൽ പൂർണ്ണമാകുന്നു.

പല ദിശകളിലൂടെ ഒഴുകി വരണ്ടിട്ടും ഒരു പാതയെങ്കിലും സാഗരം തൊടുന്നുണ്ട്. അവിടെയാണ് ‘മയമുണ്ണി’ എന്ന ജീവൻ വിജയിക്കുന്നത്. പഴികളുടെയും ആരോപണങ്ങളുടെയും തോൽവികളുടെയും മേലാപ്പുകൾ അണിയേണ്ടിവന്നിട്ടും, അയാൾ ആദ്യമണിഞ്ഞ പടയങ്കി അവസാന ശയ്യയിലും അയാളുടെ രക്ഷയായിരുന്നു.

ആ ജീവിതത്തിൽ സത്യങ്ങളുണ്ടായിരുന്നു. ആ സത്യങ്ങൾക്ക് ജീവനും, ആ ജീവന് സുലൈഖയെന്ന രക്ഷയും വിധിയുടെ കൈകളാൽ അയാളിൽ ബന്ധിപ്പിച്ചിരുന്നു.